Evangelie naar Filippus

Filippus Evangelie is 'n oald gnosties geschrifte, wölkn uut eane van 'n vierden eeuwe of begun viefden eeuwe kump, en wölkn zi'j saam hebt evunnen met 51 aandre boeken op Nag Hammadi. Di-s iene van de verleuren evangelies, de oale geschriften die deur de orthodoxie van 't vrogge christendom verketterd en vernietigd bint. Op enkeln nao dan. 't Evangelie bestiet uut völle wiesheidsspreuken, disse wiesheid zol van Jezus Christus of komm ween.

In dit vorg-kristliken wark stiet de brulfte in 'n millnpunte: 't Bruudsvertek waor 'n meanse zich met zien 'n gods-vlamme saam kump; 'n diepsten innerlik van 'n meanse saam kump met Kristus.

De evunnen geschriften op Nag Hammadi bint 'n 52 teksten, en dissnt waren verpakt in därtien papyrusboeken. 't Filippus Evangelie was verpakt saam met 't Thomas Evangelie en nog vieve aandre warken in de twiede baande.

't Filippus Evangelie is eschreven in 't kopties, maa waorschienlik is dissnt weder vertaald van uut 'n Grieks, maa luu deankt ok dat de schriever wet ehad mut hemmen van 't Aramees. Ok nemp luu an dat 't van Syrië vandan is. 't Hef ok veul geliekenisse met Valentiniaans-gnostiese deankwiezes en dorrumme is 't 'n reden umme de orsjenele schrieveri'je, in 'n Grieks, te dateren in 'n twede helfte van 'n twede eeuwe, of nog heel messchiene vrog in de därde eeuwe. 't Is dus nie zo as 't Thomas Evangelie dat 't 'n vrogge bronne is oaver Jezus; umdat Thomas eertieds is eschreven as al de boeken uut 't Ni'je Testement.

'n Inhoald

't Evangelie (Oaldsaksies: godspell) bestiet uut 'n 100 en 1 maol wiesheidspreuken, wölkn nie rap te begriepen bint, en heelmaole is 'n bepaolde gnostiese kennis en meditatie neudig. De uutspraken, of stukkies, wöd ok wel 'logions' enuumt. De tekste wöd wel 't Filippus Evangelie enuumt, maa de ienigsten maol dat Filippus der in veurkump is in logion 72 (vandaor de benaming van Evangelie naor Filippus). 't Mysterie van 't bruudsvertrek stiet in 'n millnpunte in dit vrog kristliken wark, zo verienigt ok Christus 'Adam' en 'Eva' in 't spirretwele bruudsvertrek, symbool van de herieniging van 'n meanse met zien gods-vlamme. Ok hef Maria van Magdala 'n par maol 'n duudlike rolle, wat ok typerend is veur de gnostiese geschriften, want de karke hef heur aait vort emoffeld en heur verdrungen töt iene wölkn zi'j volgens de vrogge kristenen en gnostici nie was, algemene wöd zi'j beschouwd as iene van de trouwsten leerlingen van Jezus, en en sömmige teksten kump zölfs veur dat Jezus en Maria van Magdala mekare kust.

Dit artikel is eskreven in t Sallaands.