Donkerbroek

Oet Wikipedie, de vraaie enzyklopedie
Gao naor: navigasie, zeuk
Donkerbroek

Donkerbroek is een dörp in de gemiente Ooststellingwarf van de Nederlaanse perveensie Frieslaand. Donkerbroek had op 1 jannewaori 2011 omdebi'j 1.872 inwoners. Et dörp hiette vrogger ok wel kotweg Broek.

Donkerbroek is ien van de ooldste nederzettingen in Zuudoost-Frieslaand. De ooldste vermelding van et dörp staot in twie oorkondes van 13 juli en 15 juli 1408 over een geschil mit de Bisschop van Utrecht over de huur van hujlanen. In de oorkondes wodt et dörp Dungebroek en Dongbroec nuumd.

Langes Donkerbroek lopt de toeristische route De Friese Woolden. Deur et dörp lopt een kenaol dat diel uutmaekt van de Turfroute. Rondomtoe Donkerbroek bin uutstrekte bossen en heidevelden. Now is hiervan op loopofstaand van et dörp overbleven et laandgoed Ontwiek. Hier is op een beparkte oppervlakte een staolkaorte van et vroggere laandschop weeromme te vienen in de vorm van bos, lanen, heide en veenties. Ok bin d'r resten van een wielerbaene en een eupenlochttheater. In de bos leven een tiental reeën en vule soorten bosvoegels. De veenties harbargen brune en grune kikkers en waeterjuffers as viervlekke, noordse witsnute en grote keizer.

In Donkerbroek wodt van oorsprong Stellingwarfs praot. In de 20e ieuw ontston een starke Friese invloed. Rond Donkerbroek bin een protte prehistorische voonsten daon, mit naeme uut de bronstied. Op et begreefplak staot ok ien van de klokkestoelen in Frieslaand.

Galleri'je[bewark | bronkode bewarken]

Uutgaonde verwiezings[bewark | bronkode bewarken]