Djembee

Oet Wikipedie, de vraaie enzyklopedie
Gao naor: navigasie, zeuk
Djembee oet Gana

ne Djembee is ne Afrikaanse tromme den at met de haande bespöld mut wordn. n kettel is van hoolt, woeroawer n siknvel espönn is. Volgens de Bamalistam, dee at in Mali leawt, keump n naamn van t gezegde "Anke dje, anke be", wat letterlik "Leu komt es hier en mu'j es heurn" beteeknt, wat direks ook angef woervuur at'e gebroekt wörd.

Ne Djembeetromme is meesttieds 30 cm in duursnee en ongevear 60 cm in de leankte. Ze bestoat ook kleainder, mear dan beent ze meesttieds allene vuur de sier. Duur de kelkvorm, dikte van t hoolt, soort vel, ezw, beent dr nen hoop verskilnde toonn oet ne djembee te haaln.

Toonn[bewark | bronkode bewarken]

Normaal esprökn beent oet ne djembee dree verskilnde toonn te haaln: n "bas", "toon" en "klats"-slag. Hiertusken zitt nog wier verskeaidene aandere toonn. n Klats hef n hoog, kort dreug en skoarp geluud. n Toon dut zinn naamn eare an en zeenkt n betn. n Bas is nen deepn voln klaank.

Slagmaneern[bewark | bronkode bewarken]

De bedolige is um met zo min meugelike inspanning n zo mooi meugelik geluud te kriegn. nen Bastoon wörd emaakt duur met de töppe van de vingers en n haandpälme teegn t midln van t vel te houwn. De aandere twee klaankn wordt emaakt duur bie n raand van de tromme op t vel te houwn, woerbie n "toon" wörd emaakt met de vingers an mekoar, en n "klats" met de vingers espreaidt.

Ofkomst[bewark | bronkode bewarken]

Dr wörd vanoet egoan det de djembee orsproonkelik van de malinka/Susu-leu komt, dee at better bekeand warn van öar woark as smeedn. Disse "numu" gungn oawer t hele West-Afrika oet en nömn n djembee met zik met. Mear doar steet teegnoawer det iederene op ne djembee mag spöln, terwiel at bepoalde Afrikaanse instrumeantn allene spöld mag wordn vanoet oawerleawering; t geet van vaa op zönne.

Bouw[bewark | bronkode bewarken]

De meeste djembees wordt oet één stukke hardhoolt ehakt, en t haank mear net of van de umgewing van de maker, wat vuur soort hoolt of'e kiest.

Tradisjonele djembees beent van binn nit glad eskoerd, mear hebt ne spiraalvörmige binnkaante um de toonklaank te verbettern, mear spleenters en roewe voarn beent nen teekn van hoastwoark. t Vel is meesttieds van nen sik, mear kan ook van antilopes, zebraas, hertn en kookalvere komn. n Siknvel oet Afrika hef n aander geluud as n siknvel oet Europa. In Europa hebt de sikn meesttieds n makkeliker leawn, woerduur at ze vake n meender toa vel hebt. Dit hef invlood op n klaank en op de wearboarheaid van t vel.

Europa is al völle länger as Amerika bezig met djembees. Terwiel at Amerika oawerspeuld wör met zachtheultne djembees van lege kwaliteit, hef Europa det soort djembees aait teegn eheuldn.

Oet biegeleuf wordt nooit de velle van n männken ebroekt, mear aait van n vröwkesdeer.