Bokel (Eanske)

Bokel (Nederlaands: Boekelo) is n kerkdoarp in de Tweantse gemeente Eanske in de Nederlaandse proveensie Oaveriessel. Ut doarp hef ongeveer 2100 inwonners.

t Doarp is vuural bekeand van t zoolt wat ze doar seend 1919 boawngroonds haalt (de inwonners wordt hierduur Zoaltkloetns eneumd), zudelik van t doarp. Toertieds steund Bokel ook bekeand um t Bokelbad, wat spesjaal vuur de leu was an elegd, um t volk, krek as in t westn, te loatn genietn van t zwemn in zoolt water, met doarbie zelfs n zooltwatergolfslagbad. Noadet t Tweantekanaal an elegd wör, wör de toewmoalige Koninklijke Nederlandse Zoutindustrie (rechtevoort bekeand as Akzo Nobel) verplaatst noar Hengel. Ook konn ze good met textiel in Bokel: in 1888 richtn G.J. van Heek de N.V. Boekelosche Stoomblekerij (n Bokelsn Stoombleek) op, den at in 1965 wör oawernömn duur Unilever, den at t bie P. Fentener van Vlissingen & Co's Katoenfabrieken N.V. dee, wat later Texoprint wör).

Rechtevoort beent ze in Bokel gangs um t industriegebeed umme te zetn noar ne wonwieke: De Blekerieje. De oolde historiese gebouwn hebt ne bestemmige kreegn en bliewt doarduur bewoard.

In 2004 hef de Grolsch in Bokel ne nieje brouwerieje lös edoan op t bedriewegebeed De Grote Plooy kort bie t doarp, an de snelweg A35.

n Groot gebuurn in de ruutersport is de Bokelse Military. Ook de bosrieke umgewing trekt völle toeristn, dee at dr gearne fietsn goat. t Museum Buurtspoorweg geet met n treintjen van Bokel noar Hoksebarge, met oonderwiel nen tuskenstop bie de halte zooltindustrie van t Labyrinth van Zinnen bie Hotel Bokelbad.