Body Stress Release

Uut Wikipedia, de vrye encyklopedy

Body Stress Release (aofekort: BSR, vertaald: spanning in t lief loslaoten) is n gezondheidstechniek die op t lief warkt. Disse techniek richt zich niet in t biezunder op n ziekte of n lichamelik probleem mer aktiveert, via de spieren, t zelfherstellende vermogen. Dit van nature anwezige vermogen wörden minder as spieren niet meer op-ebouwden spierspanning los kunnen laoten. Disse vastezette spierspanning (body stress) beïnvleut t zenuwstelsel. t Zenuwstelsel hef veule funksies, zo as t besturen van de spieren, de organen, de zintugen, t maag-darmstelsel, de hormonen, de warmtehuushouwige, t slaap- en waakritme en gao zo mer deur. As dit t niet meer goed döt, dan veroorzaakt t klachten op alderhaande gebiejen.

Bie t Engelse woord stress (veur spanning) denk je vake an te drok ween, alles vlogge doon, n naor geveul, einddaotums haolen en gao zo mer deur, mer toch he'j stress in n bepaolde maote neudig. t Huilt je aktief, stark, waakzaam en zet an tot veuruutgang. Mer as de persoonlike grens tussen de beneudigde spanning en te veule spanning te vake overschrejen wörden, dan kan t ummeslaon in negatieve verschiensels/klachten. Disse spanning wörden dan deur t lief as spierspanning vastezet um t lief te bescharmen, te spalken as t waore. As dat lange zo blif en bie herhaoling gebeurt, hef dit gevolgen, n paor veurbeelden bin: vastezette/strage spieren, zeerte, of de heeltied meui ween. De kommunikasie tussen de harsens en t lief is dan in t wiere en klachten ontstaon umdat t zenuwstelsel zien wark niet meer goed kan doon. Vake wörden dit ezien as n tekortkoeming van t lief en dan is der de neiging um der extra tegenin te gaon. Hierdeur reageert t lief mit nog meer anspannen en vastezetten van de spieren, t zenuwstelsel wörden opniej beïnvleud en zo geet t veurdan, soms jaorenlang. Op disse maniere kunnen der steeds meer klachten ontstaon.

Losmaken[bewark | bronkode bewarken]

t Opslaon van spierspanning (body stress) is goed eregeld; t lief zörgt derveur dat dit in bepaolde patronen gebeurt. De Body Stress Release-therapeut is op-eleid um disse patronen te herkennen en op te sporen waor en in wat veur n richtige t zit. Hij/zee döt dit deur bepaolde gebiejen rondumme de warvelkolom te testen en maakt hierbie gebruuk van t zogeneumde bio-teroegkoppelingsmechanisme van t lief. As der sprake is van vastezette spierspanning zal t lief bie t testen reageren deur middel van reflexen. De BSR-therapeut kan disse reaksie aoflezen as n kleine bewegige in de voten. Op disse maniere kan heel zörgvuldig vastesteld wörden hokken loslaoting de pasiënt neudig hef en in wat veur n richtige t uut-evoerd mut wörden. Disse methode is effektief umdat der gien eigen interpretasie neudig is, niet van de pasiënt en niet van de BSR-therapeut.

De behaandeling besteet uut t geven van kleine impulsen mit de vingers, dumen of haanden op de juuste spieren en in de juuste richtige. t Lief kan deur disse impulsen de spanning lage-veur-lage loslaoten. Hierdeur krig t zenuwstelsel weer de ruumte en de kommunikasie tussen de harsens en t lief zal herstellen. Dit is belangriek veur t zelfgenezende vermogen dat derveur zörgt dat de natuurlike veerkracht en gezondheid weerkeert.

Dit artikel is eskreaven in et westveluwske dialekt van Nunspeet, in de Algemene Nedersaksiese Schriefwieze.