Beleg van Grol (1627)

Oet Wikipedie, de vraaie enzyklopedie
Gao naor: navigasie, zeuk
Beleg van Grol deur Frederik Hendrik (1627)

't Beleg van Grol was ne belegeringe van de veste Grolle in 1627 deur Frederik Hendrik, ok wal den 'Stedendwinger' eneumd. 't Was in de tied van den Tachtigjoarigen Oorlog, en Grolle was in dizze periode meermoals bezet ewodden deur de Spaansen. Um de stad noa joaren van Spaanse bezetting endelek definitief weerumme te kriegen veur de Nederlanden, hef Frederik Hendrik ne grootse belegeringe op-e-zet. Nadat hee met zien laeger van wal twintigduuzend man in iets meer as ene wekke ne onmundige 'circumvallatieliene' van 16 kilometer lang had an-e-legd, zodat gin mens de stad nog in of oet kon, begun Hendrik Grolle duftig onder vuur te nemmen met kogels en vuurballen. Langs dizze liene waren schansen en andere fortifikasies ebouwd veur de tröppen en kanonnen, zoas de Engelse schans.

Ondertussen gef Hendrik ziene Engelse, Friese en Hollandse soldoaten opdracht greppels richting de stad te graven. Eenmoal doar an-ekommen probeerden zee de stadsmure oaver te klimmen, wat de leu in de stad oet alle macht probeerden te verhinderen. De Engelsen hebt dan met nen mien de muren opeblazen, en toon et laeger deur et gat gung en de Grolse wallen derachter wollen opklimmen, lagen de stadse leu al te wachen met heure geweren. Dree moal probeerden zee der op te kommen, en dree moal ging et haevig vedan, met ne bulte gewonden en doden, woarunder Willem van Nassau, heer van de Lek, den op de leste dag nog et loodjen legden. Pas toon de stad van dree kanten zol wodden anevallen, hef den anvoerder van de Spaansen, Matthijs Dulken, zich ovver-egevven. Al met al duurden et zowat 'n moand veurdat de Spanjaarden der genog van hadden en zich oavergaven.

De Spaanse troepen moggen vertrekken van Frederik, zoas dat in een verdrag met mekare was beslotten. De Grolse leu moggen in de stad blieven, op veurweerde dat zee et kattellieke geleuf af zollen zweren. Dat deden ze dan moar, veur de vorm, want in 't geniep blivven zee met z'n allen katteliek. Grolle was noo endelek in-enommen en zol in Staatse handen blieven tot 't ende van den oorlog.

Nuvola apps ksig.png Dit artikel is schreven in t Grols, verbetteringen bunt altied welkom.